Wia mei Spuikastl ausschaugt

Genaua gsagt, hab ich inzwischn mehrare Spuikastl:

Des große Spuikastl is 1 Meta 35 broat, 1 Meta 10 tief und 2 Meta 50 hoch. Es gibt vo dem a no a niedrigare Variante mit 2 Meta 40. Da is der Giebe mitm Schriftzug niedriga. Baut habn des Spuikastl meine Chefs selba. Und so schaugt s aus:

Meistns kimmt des variablare kloane Spuikastl zum Einsatz, Des is 1 Meta 35 broat, 1 Meta tief und maximal 2 Meta 30 hoch. Es hat gar koan Giebe und is deswegn niedriga. Außerdem lasst si da obere Teil in vaschiedene Varianten aufbaun. A des Spuikastl habn meine Chefs selba baut. Und so schaugt s aus:

Beide Spuikastl san komplett zalegbar, weil meine Chefs de mit m Radlanhänga oda Handwagl transportiern. A unsa Tonanlag kimmt in am großn Koffa auf oan vo unsane "Hinterher". Des is a sehr guata Radlanhänga, der se mit oan Handgriff in a Handwagl umfunktioniern lasst. Meine Freind und i san im Rucksack oder ana Radltaschn. So bin i scho U-Bahn gfahrn, Bus und Bahn und natürle Radl. Segn kenna ma da unterwegs allerdings nix, weil da Rucksack und de Taschn koa Fensta ham. Schad! Dafia habn ma aba scho Wirtsheiser und Biergärtn gsegn, Büchereien und Kindagärtn, a Bauernhofmuseum und Pfarrheime.

Für unsane Auftritt im Freilichtmuseum Markus Wasmeier am Schliersee habn ma dann no a andans Spuikastl. Des hat da normalaweis im Beham-Hof sein Platz. Manchmoi stehts aba a andaswo im Museum. De Bühne hat an Markus Wasmeier sei Vatta fia uns baut. Und so schaugt des andane Spuikastl aus: