Welche Stückl ma spuiln


Kasperl und Sepperl zu de Stückl für Kinda

zu de Weihnachtsstückl für Kinda

Faust und Mephisto zu de Stückl für Erwachsene

 

Stückl für Kinda

Des san unserne Stückl fia Kinda ab 4 Jahr. Kleanane derfa a kemma, solltn aba eahnane Eltern oda andane Erwachsne dabei hobm. Und üba Groaße, de gern ins Kasperltheater genga, gfrein ma uns a. A jeds Stückl dauat so um de 30 Minutn. 

Kasperl und Sepperl

Kasperl und da Sonntagsbratn / da Geburtstagskuacha / de Bratwürscht
Je nach Anlass kennan da Großmuatta a Bratn, a Kuacha oder Bratwürscht abhandn kemma. Was is da passiert? Hat des Krokodui was damit z toa, des aus m Tierpark ausbrocha is?

Kasperl und des Kuchnmonster
Da erschafft da Teife a Kuchnmonster, um an da Großmuatta ihrn Guglhupf z glanga. Aber des laaft net ganz so, ois wia er si das vorgstellt hat...

Kasperl und da bäse Teife
Da legt sich de Großmuatta mit m Teife o. Des hat fatale Folgn. Guat, dass den Kasperl gibt...

Kasperl und da dumme Räuba
Da kapiert da Räuba net, was da Teife für a bäs Spui mit eahm treibt. Denn dem gehts wieda amoi bloß um da Großmuatta ihrn Guglhupf und er nutzt an Räuba sei Guatglaibigkeit aus, um den z kriegn.

Kasperl und da Hexntrank
Da huift de Hex beim König in da Küch aus und auf oimal macht der König nur no, was de Hex wui. Kenna da Kasperl und Sepperl da helfa?

Kasperl und de Flaschnpost
Da hat de Hexe de Prinzessin entführt und in an Turm gsperrt. Kasperl und Sepperl solln s mitm Wassermann zsamm befrein.

Kasperl und des Zauberbuach
Da helfa da Kasperl und Sepperl am Zauberer, sei Zauberbuach wiedazfindn. Wo das woi hikemma is? Oder hats gar jemand klaut?

Kasperl und des Schlossgschpenst
Da konn da König auf oamal nimma schlafa und woaß net warum. Dafia gibts auf oamal bei da Großmuatta jemand, der gar net gut auf den König und de Prinzessin z sprecha is. Ob des was mitanda z toa hat?

Kasperl und de drei Wünsch
Da macht da Sepperl an ganz an blädn Fehla und wünscht si des Foilsche... Hoffentlich kann eahm da Kasperl da helfa.

Kasperl und Sepperl auf Schatzsuche
Da woilln da Kasperl und da Sepperl in ana Vollmondnacht an Schatz findn, was si ois gar net so einfach rausstellt...

Kasperl und de Weißwürscht
Da kummt da König auf Bsuach zur Großmuatta. Und kurz bevor a okimmt, passiert am Sepperl was ganz Bläds.

Kasperl und da gierige Bänker
Da klaut da Bänker da Großmuatta ihr Geld
 

Unserne Weihnachtsstückl

Kasperltheater mit Figuren 

De Stückl fia Kinda passn in d Advents- und Weihnachtszeit:

Kasperl und da Krampus
Da wird oa Möglichkeit vorgstellt, wia da Nikolaus zu seim Begleita, am Krampus, kemma sei kannt.

Kasperl und da verhexte Wunschzettl
Da stehna ganz varruckte Sachan auf de Wunschzettl vom Kasperl und vom Sepperl. Wer steckt da dahinta und wia lasst si des wieda in Ordnung bringa?

Kasperl und da Stern von Bethlehem
Da miassn da Kasperl und da Sepperl de Weihnachtsgschicht rettn. Denn da Stern von Bethlehem is vom Himmel abagfalln und oana vo de Drei König hat si deshalb verirrt.

Kasperl und da Adventskranz
Da vaschwindt da Adventskranz, den de Großmuatta selba gmacht hat. Aber Advent ohne Adventskranz, des geht ja gar net! Also miassn da Kasperl und sei Freund Sepperl helfa!

Kasperl und des Krippenspui
Da hat des Krokodui a fast unlösbars Problem. Denn es wui unbedingt beim Krippenspui mitmacha. Ob das gutgeh konn?

Kasperl und de Weihnachtsplatzerl
Da kummt da Großmuatta des Weihnachtsgebäck abhandn.Was is da passiert? Hat des Krokodui was damit z toa, des aus m Tierpark ausbrocha is?
 

Stückl für Erwachsene

Kasperltheater mit Figuren 

Das Spiel vom Dr. Faust - oder: Das Böse sitzt auf einem Baum
Faust im Hier und Jetz, a Puppenspui frei nach oide Puppenspui vor Goethe (Simrock, Ulmer Puppenspiel) und am Goethe seim Urfaust, Aufführungsdaua 75 Minutn, geeignet ab 12 Jahr. Mehr zu dem Stückl unta www.kasperlsspuikastl.de/faust-festival2018.htm.