I und wer no zu uns ghert
Da Chef vo unsana Truppn, des bin natürli i, da Kasperl.
Vo mir hat unsa Spuikastl a sein Nama. Mi gibts scho ewig und drei Tag, in dem
Spuikastl aba erst seit 2009.
Zum Kasperl ghört natürli da Sepperl dazua, mei besta Freind, der oiwei Hunga hat.
De Großmuatta bacht und kocht imma guate Sachan für uns. Vor allm ihrn Guglhupf megn ma bsondas gern.
Ganz wichtig is des Krokodui, des in koan Kasperltheater fehln dearf. Des is grouß und grea und hat a rots Maul mit ganz vui spitzige Zähn drin.
Da Polizist probiert oiwei, des Krokodui zum fanga. Dawischt hat as aba no nia net.
Da König is net oiwei da schnellste und manchmoi a weng naiv. Da is guat, dass a a Tochta hat, de Prinzessin. De kon aba a ganz sche zickig sei.
Erst vor Kurzm dazuakemma is unsa Prinz. Der is a eitla Lackaff, der am liabstn feian geht.
An Räuba hamma a. Der is a weng a Dodl und ganz sche begriffsstutzig. Da kenna eahm andane leicht bratzln.
A ganz a Bäsa is da Deife. Der hats aufn Guglhupf vo da Großmuatta abgsegn, weil der Kuacha von seina Großmuata so greißlich is.
De Hex is a a ganz a Bäse. De probiert oiwei Leut zum verhexn, damits macha, was sie wui.
Da Zaubera dagegn is mehra a weng a schusseliga Wissenschaftla mit magische Kräfte.
Da gibts aba a no a andas magisches Wesn: de Guate Fee. Wenn gar neamd sonst mehr helfa koa, dann muass sie ro.
Da Mann im Mond is a guata Freind vom Zaubera und kommt zu dem z Bsuach mit seina Raketn auf da Erdn.
Da Rote Ritta lebt mit seina Frau Elvira in ana Burg. A wenn a a Ritta is, zoagt eahm doch de Elvira, wo's langgäht.
Da Goldene Dracha bewacht am Ende vo da Welt de blaue Rosn, de oanzige blaue Rosn, de s übahaupts gibt.
Des is de Eule, de im Eulenwoid lebt und bsondas weise is. Wenn ma s was fragt, redts imma in Reime.
Woanders im Woid, da lebt in am kloana See da Wassamann.
Des Kuchnmonster hat si da Deife erschaffa,weil a glaubt, a so an da Großmuatta ihrn Kuacha z kemma.
In unsana Truppn habn ma a no a Gschpenst.
Und des is da Bäcka. In manche Stückl muass a aba a ois Metzga herhaltn und oamoi sogar ois Koch.
Des is da Lehra. Da gibts aba a oa Stückl, wo a a Bänka sei muass.
Des is da Osterhas. Des siecht ma ja und der kimmt natürli nur in unsane Osterstückl vor.
Und des is da Nikolaus. Des kennt ma glei und der kimmt natürli nur in unsane Weihnachtsstückl vor.
Und an Engl gibts a in unsane Weihnachtsstückl, aba an ganz an spezielln...
Und des is unsa Giacomo, da Krah aus Sizilien. Der buidt se ei, dass er da Impresario vo unsam Theata is. Ja mei, soi a s glaubn! Zumindest derf a oiwei den Vorspann zu unsane Stückl präsentiern ...
